Eroko Itunga Ibariete Okutui k’Karamoja

Itunga ko Karamoja kesi eroko ibariete okutui, ibore ebalasi imurok ebe itopolorit anyalatoi na epirididi.

Amucalat itoduni aipany na amen ngesi adukokin arwatat pac.

Itunga kotoma ari nako Karamoja kesi eroko inyikokitos aicak ebar okitui.

Ejena bo ebe mam erai Karamoja bon erokotor itunga ibariete okutui, konye iripotan lu egelegela kesi ibeliaritos ebe itunga lu ipu kangina kesi epeleikitos ikulepek aigir aibok acolonin.

Ariebasinei nu imoriaritos epirididi (Ailep), typhoid kede acie da nu eyatakin esula kec k’Moroto ngesi ebalasi ipiriotin lu angaleu ebe erai kanu amamus kede aila na itekora.

Lo idararoi kwape apolokiton adekis nako Moroto Regional Referal Hospital, Dr Fred Ogwang ngesi ebala ebe epirididi kede typhoid kesi kopana adekasinei lu ilwaritos itunga noi ko Karamoja. “Elepete itunga noi ido erai itunga kidding na ikaru ikany kede 59. Naarai etep edou, eleleari ebar keere toma ocor,” enera emuron.

Kopana itunga luko ocalo lo Nakapelemen, ojai obooma Moroto kesi epeleikitos ajalakin aiboisit adiopet na epoloi ekitui kotoma ke tetere itunga ekerianarete ebar ngina.

Amucalat Rita Logile na iboiyei kocalo loko Longorok, kojai otem Rupa ngesi ebala ebe ican lu eridakitos itunga kesi ijaikitos kesi eroko ekerianarete okutui.

“Mam kome isio da itojokarit ebar okutui, konye ican. Mam ber engo apedorit adumun ikapun lu atacakini engo iyungana abokikin engo aipany,” enera Logile.