Etodoliki Ogwang Aisumuneta Ke

Adiope kotoma awanyunet na eingarenon lo ajokan ngesi aitodolinikin aisumununeta ka aitopoloorit eijanakine lo ajokan kotoma atutubet.

Kwangen ngesi obu Hon Peter Ogwang, lo erai MP lo obuku Usuk iswama aparan kana esabiiti erai 28, Odunge (April), 2019 irimorit itemwan luko Akoboi, Ongongoja, Katakwi ka Getom.

Ogwang ngesi obu odilok airimokin aiboisio ngun kosodi aitodolinikin aisumununeta ke nukolo ejaikit ngesi itunga aparasia nu esupia aseeta.

MP Ogwang inerasi ka itunga luko Dadas kana esabiti

Ogwang ngesi obu ikwenyak itunga ebe adiopet kotoma aisumuneta ke ngesi awanyun ebe isinyikoikini apugan aiyatakin atiakun itemwan icie ka icaaloi icie tetere eijanakine lo ainapeta apugan eyapuuni kotunga luko okwap.

Inyikokit eirior ke, Ogwang ngesi obu isiriengu itunga kede iyemuto lu ajokak lu ikamunitos ainapeta ke nu akorakin akinei 1.300 ne ejaasi angor kangin ecaalo obuku kalo Usuk.

Itunga kotoma aiboisio nu egelegela kesi opotu osalata eyarit aiyalama kanu aswamisio ke Peter Ogwang.

Charles Aleper, lo erai agwoikiton itunga lu otem Akoboi ko district, ngesi abu icorak itunga ainyikokit ailipanakin Hon Ogwang Peter naarai apolor areiyo.

“Ikatunga, ipupete esu iyemuto ebe ejaasi lu kwana icebokitos atamit aitikokolit Honorable, ecasitos oni da ailip Lokasuban iyatanakini Ogwang arerengesio,” Inera Aleper.