Atukutu Iteso Shs 69M Kanu adukuna Adekis

Nepe ecila kide, akwat nu itunga kesi katupuruc kana alolo (Naesabiiti 05, 05, 2019) kesi opotu ilelebata alaro na aipugaikin bon (Public Gardens) ko Soroti kanu aigeng akerit kanu atukun ikapun lu edukunere Adekis na Angor kede Iduwe na itegelikina.

Itunga ekapanakinos kanu aburor aijony ko alaro na aipugaikin bon ko Soroti

Akerit na adilokitai ngesi aria na aojau na amairon 10, amairon 5 kede amairon 2 kanu iduwe ido itunga kesi atacete ikapun 20.000/= kanu adumun atikit na akerit.

Lo apolokit ekomiti lo ayait ainapeta nu akerit na atukun ikapun, Dr. Joel Okalany ngesi abala ebe adekis ngesi ebeit adukio kotoma adokena nu egelegela, ido, ekoto adukio ikapun 3.5 billion kanu angetakin adekis na ejai Oderai, orot lo enyouni ko Soroti abear Serere.

Okalany ngesi obu itigogongo ebe ikapun imilionin 69.2 ngesi opotu itunga lu egelegela isumunoto alemun, kosodi imilionin 16.3 kesi oponi otunai cash.

Obu bobo iyatak aikwenyakin itunga ebe adautu lu ojokotau aisumun ikapun 900 million kanu ainapeta nu adukio na adekis.

Lo arai akeran lo angosibib, Hon. Capt Mike Mukula, korai da bobo atupiton apolokiton epate loka NRM ko ari nako Kide, ngesi obu itur ateker Iteso kanu aitodun aibumakina kanu aiduk ka aitopol Ateker.

Mukula ijaikini eirior ke kwape epejonon lo angosibib eroko etwarara itunga ageun aijony.

Kotoma oirior ke kotoma apak na etegeara akerit, Mukula ngesi obu isiriengu etungat lo atukuna kede iyemuto ebe President Yoweri Museveni ngesi esumunit alemun ikapun 50 million kanu aigangia ainapeta nu adukun adekis.

Kwape epejonon lo angosibib, Mukula ngesi obu iyatak aicorakin atumunak aisac akwamakit amat ka aika apailon naarai ipu adekasinei nu etereikina keda kesi.

“Emamei apol kotoma aiboisit na edekatar itunga lu ipu, aso ekoto esu acoikina,” enera Mukula.

Icie kotoma otunga lu ajaasi aijony emorete aiyalama kede LC5 Soroti, George Michael Egunyu keda Hon Anne Adeke Ebaju pac.

Icie kotoma engarenok luko Teso lu ajaikina aigeng nepe iwali akwap kesi emoriaritos MP lo Soroti Municipality, Herbert Ariko, MP na angor ko Soroti, Angeline Osegge, LC 5 Soroti, George Michael Egunyu, MP na angor ko Serere, Hellen Adoa, MP na egwoikit atumunak nupesur ko Uganda keere, Ann Adeke Ebaju, ka icie da.