Eroko NRM Icasit ko Teso

Apejo na pac etolosi President Yoweri Museveni ko Teso ngesi esideleleu ebe eroko apugan naka National Resistance Movement (NRM) kicasit ko Teso.

Iyemuto lu kesi edelelete kotoma apak na atukokitor epate loka NRM ainumunum kec laije ocaalo lo Okulonyo, otem Usuk- Katakwi district (eraasi 15 June, 2019) kanu aitub aseo na ekaru 2016.

President Museveni inerasi ka itunga ko Usuk pac

Ilukumin lu itunga lu engarenikitos Mps Peter Ogwang ka Violet Akurut, LC5 Walter Elakas Okiring Ongimakol, kesi epotu eburokinos eibwong kituritos angosibib na eswama epate loka NRM, kisumunitos aikwet Museveni kedolu aseo okaru 2021.

“Papa President, ageun ne ilomara ijo oicolong, ejena ebe mam aijaanakin akwap akwap erai ibore yen epatana, konye nu iswama ijo, idelelete keere,” abala MP Ogwang.

Iusuko kesi opotu ikopakisi MP kec Peter Ogwang emakuk ka akwara aijaikin President Museveni kwape awanyunet ebe ibusakinit ngesi aiboikin oicolong aiyatakit aingarenikin Ateker.

“Emakuk lo ka akwara, ebalasi Iusuko ebe osalak iboiyei oicolong kon,” enera Ogwang ikopakini epresident emakuk ka akwara.

President Museveni ecedunete adis ka Mps Peter Ogwang ka Violet Akurut

Kedol ebong (napa emukaga) kebongo Museveni Soroti, engarenok bobo ko Teso kesi opotu otukokinos kosodete aisiboikin ePresident kwap, kosede alimokin ebe adautu Iteso acamanar ebe ekotosi kesi Museveni abongokin aipuga kedol aseo.

President Yoweri Museveni idokokini akan aitogogong ailipa iteso kanu ngesi abongokin aigwo kwape ePresident kedol 2021. Kedian na aputo; MP na angor nako Bukedea Anita Among, kosodi lo Chairman NRM Katakwi district, Opio Edeket ka lo erai erai atupiton eChairman lo epate kalo NRM ko ari nako Kide, Capt. Mike Mukula.

Akiro ke Museveni

Kiriamunun kede itunga, Museveni ngesi abu isialamik Iteso kanu acamun aikwet abaasi okaru lo 2016.

Iyatakit ineresinei ke, ePresident ngesi obu itigogongorite ailipit engarenok aicor itunga atiokisio nu amunamun alupok.

Enera ebe ibore yen apol kakere yen abunitor ngesi aipejokin Iteso ngesi aingarakin aipirun acoasinei nu aiyatakin enyadu kotoma okalia, kede aisianakin Ateker ajokis na aitopolor akoru na akwana na imedai, kitabari da.

“Edolit ikalia aimor aitwasam alupok nepepe kosodete aimor araito konye mere anyilinyil alupok agwelanar,” aba ePresident.

Aibar ka Alupok Adis

Museveni ngesi obu isisianak Iteso epitene lo akoru na akwana na itabari itunga lu ikidioko alupok. Obu isinyikoik itunga aitwasam amisirin aongon (4) kanu abaria.

Kotoma oiner ke, abu isiirik itunga ebe;

1. Amisiri adiopet ngesi ibusakit korai na ekorikino inyamat lu ekale kwape nat emwogo, emaido arai emudunga.

2. Amisiri na iyareit ngesi ibusakit korai na iraikino araito kwape nat emwebe, emucuga, ematuda arai bo nat enanasi.

3. Na iunikini nnesi ibusakit korai amisiri na ekorikino anya nu ibaren, kanoinoi akituk nu akile.

4. Aomisioit na awasia na ngesi itunga aitopoloor aitwasam aguleik kanu akorikin inyamat lu atipet kwape aboo, aipit akokorei, ipegei kosodi aipit agaria kanu angun lu eyapiete kede isama.

Kanu aitogogong eirior ke, abu Museveni kilip itunga luko Katakwi adumakin ngesi amisirin aongon (4) nu elosi ngesi aitwasam kwape awanyunet ne ejaasi itunga lu eroko ebuinikinos aicoreta ke.